2016-05-24 Lab Eat Restaurant (Part I) - 同朋友慶生的好地方

今晚約了我的好友黎補祝佢生日, 就試下呢度啦~ 呢度位於尖沙咀韓國街附近, 唔識路都要搵搵架, 不過好在我有GOOGLE MAP者~

入到黎人唔算多, 我倆原本想調去窗口位置, 但餐廳話已經比人FULL BOOK哂, 平日黎講都算幾好生意喎

就叫SET啦, 唔使煩, 朋友唔食牛, 我地又想SHARE食, 就叫個PASTA同鴨胸啦

先黎個餐包, 有D失望, 凍既.... 不過都算鬆軟

燒牛肉沙津, 朋友比哂佢D牛我, 我覺得都幾香牛味喎, 又夠腍身, 而且D PEPPER 同其他SEASONING 好能帶到D牛肉味出黎, 再加埋個沙津醬一齊食仲惹味, D菜都幾新鮮

今晚餐湯係周打蜆湯, D蜆都幾肥美, 隻隻鮮甜多汁, 得!

香草燒鴨胸配燒汁, 個賣相GRILL得好靚, 仲有好大舊, 我地兩個女仔都好擔心食唔哂. 第一口食落有D硬同蘇, 不過再食都覺得幾好食, 如果可以再JUICY D 會更好

明太子吞拿魚忌廉汁長通粉, 呢個吞拿魚用左開心果包住外圍再煙薰, 小妹本身不太好TUNA, 因為好似生豬肉咁, 不過呢道菜整得個感覺唔太生, 好似火灸過咁, 所以OK, 而且佢用開心果都幾得意, 不過開心果個味就唔太出, 同TUNA個味唔係特別夾, 另外個明太子係用醬油醃製過, 好重口味, 一定要撈落個意粉度一齊食先啦, 如果唔係會好咸, 不過我幾鐘意

最後壓軸緊係甜品啦, 我比左個小小既驚喜我個FRIEND, 個甜品左邊係芝麻芝士蛋糕, 香濃芝麻味, 唔膩, 好好食; 右邊係用左個紅色既面包, 包住藍苺芝士蛋糕, 上邊再配以鮮藍苺及士多啤梨, 只係賣相已經贏哂了! 味道都好清新醒胃架, 雖然我倆都幾飽了, 但個甜品依然比我地沽清~
可以再黎呀~