2015-11-22 陶源酒家 - 好好味的午飯!

今日相約咗同事一齊食午飯, 有啲時間我哋就去咗附近嘅陶源酒家嘆下茶啦, 我哋兩個女仔唔算食得多, 不如就叫D點心啦!

首先就叫左個一直想試下既雀籠點心, 單睇外表已經覺得好吸引啦, 而且仲可以一次過試六款點心, 真係幾好喎! 我最愛去嗰個嘅萄汁雞粒酥, 好惹味, 而且酥皮熱辣辣, 食落好新鮮! 第二最愛呢就係佢個鮑魚燒賣, 鮑魚夠稔身, 肉質鮮味, 亦得! 其他蝦餃, 芋角都唔錯架!

跟住就叫咗個清清地嘅牛肉腸, 腸粉質地爽滑, 牛肉鮮味, 我本身唔太好呢款牛腸都覺得好食喎!

最後我哋加左個蘿蔔糕, 蘿蔔糕睇落白曬曬, 但係原來食落都好好味喎, 重蘿蔔味, 再加少少豉油就已經吊出蘿蔔糕同埋臘味惹味, 陶源整體上嘅質素真係幾好架, 會再來!

2015-10-29 龍閣極上火鍋

今日約左我既一眾為食兵團同事黎旺角飲茶, 順便FAREWELL一個好同事, 呢間龍閣極上火鍋裝修別緻, 估唔到個位置會有間咁靚嘅酒家. 一入到去好有空間感, 我地一行五人被安排左坐門口附近, 都坐得好舒服. 發覺D火鍋店依家日頭會興做埋點心, D質素都唔錯!

一黎到就梗係猛TICK我地至愛既點心啦, 咦! 都幾多選擇喎! 第一樣唔少得既係我既至愛點心蝦餃, 蝦餃皮薄餡靚, 冇得頂!

馬拉糕雖然唔及潮福既黑糖馬拉糕咁香咁好味, 不過呢到都整得好鬆軟喎! 唔錯!

另外叫左黑松露帶子腸, 黑松露味不是太出, 而帶子個味本身清淡, 所以整體上來講呢個比較PLAIN D.

另外我同事叫左個藍莓鮮淮山, 呢道菜唔係度度有得食咖! 都幾大碟喎, 鮮淮山本身就無乜味既, 全靠個醬, 我地覺得藍莓醬就唔夠多, 所以我地另外REQUEST左一碟, D淮山食落好粉, 我個人唔太好呢個TEXTURE既食物, 最後係食剩左一半.

燒賣, 味道保持水準!

芙蓉山湖帶子餃, 餡料鮮味, 皮薄, 得!

香煎釀尖椒, 我同事的至愛, 不過我覺得有D辣, 我食唔到LU, 同事就話幾惹美

仲有不得不提既就係呢個奶皇煎堆仔, 呢個超好食!!!!! 一定要encall在encall!! 奶皇好流又夠沙, 新鮮熱辣又香口! 好好味呀!

我地再加左一個三文魚龍閣炒飯, 賣相好得, 而且炒得都幾乾身, 不過呢個飯就未及佢既點心咁出色啦. 

每人$100 唔使, 可以再黎呀!!!

2015-10-31 E Molto Buono

今日男朋友終於做完功課, 搞到8點幾9點先至可以食晚飯, 所以我梗係要帶佢去食好野餵勞下佢啦!

我地去左銅鑼灣一間法國餐廳, 呢棟大厦係拍拖早期都有黎過, 不過係另外一間CAFE, 入到餐廳裏面, 咦? 比我想像之中細喎, 空間感不大, 起初侍應安排左我去近窗口位置既一張二人枱, 

不過由於我有的扐住一袋二袋既的關係坐得唔太舒服, 所以侍應安排左我去左一張四人枱, 坐得舒服D. 

我同男朋友都唔太飲酒的關係, 所以我地都叫左一杯菠蘿汁. 我地ORDER左兩個SET DINNER

呢度個麵包好有驚喜, 應該係師傅自己做的, 加左香草去焗, 熱辣辣好鬆軟. 

頭盤我地分別兩個都叫哂, 一個係煙肉水牛芝士佯番茄凍, 呢個頭盤味道清新, 感覺開胃, 芝士唔會太濃, 我鍾意呀! 

另外頭盤係吞拿魚牛油果他他, 由於我就唔太食生野, 男朋友就比較喜愛呢個, 吞拿魚肉質新鮮, 牛油果有夠香, 加埋一齊都好有CHEMISTRY!. 

跟住就係我至愛既龍蝦湯啦, 龍蝦湯味道濃郁, 好有龍蝦鮮味, 有誠意之作! 

男友叫左個蘑菇湯, 碟上仲配左個麵包, 上面有粒粒蘑菇, 嘩, 飲落啖啖蘑菇肉, 好得! 如果要我評分, 我會覺得呢個蘑菇湯會做得比較出色D!

法國鵝肝伴焦糖蘋果, 不負眾望, 鵝肝外脆內軟, 揚溢著油甘香味, 所有卡路里脂肪完全唔理! 

另外白酒煮藍青口, 加入左火腿去煮, 味道比較咸, 同侍應反影左佢就話因為呢度既廚會跟傳統的法國嘅主法, 所以味道會濃一D, 我同男友都偏愛比較清淡D既白酒煮加白汁煮, 不過青口都係好新鮮的. 

食完幾度菜, 中間會有一個紅桑子雪芭比我地清一清口腔, 再食下一度的主菜. 紅桑子雪芭味道真係好清新, 感覺好FRESH呀, 我既戰鬥力又提升了!

襯個MAIN未黎, 我地出左去露台睇下, 咁樣望出既銅鑼灣感覺都幾唔同, 有D似煩囂中的一個綠洲.

主菜分別叫左澳洲神戶牛排同埋同埋香煎虎蝦伴辣肉腸. 虎蝦新鮮又大隻, 加埋自製既番茄醬好得! 不過都係略咸左少少.

由於我太飽的關係, 澳洲神戶牛排我淨係食到幾舊, 好彩有男朋友係到! :D 呢個牛好得! 肉質鮮味, 充滿油甘香, 掂! 仲有佢下面有個紫色蕃薯蓉托底, 我真係好appreciate呀! 正迎合小妹呢個蕃薯怪既口味, 不過側邊既醬汁就一般

最後一個甜品係法式香橙焦糖燉蛋白, 查實我當時已經99%, 不過呢個燉蛋真係好好味, 甜度適中, 賣相又靚, 所以我都差唔多食曬呀! 呢度可以再黎呀!

2015-10-21 Panash 大失所望!

呢度係我以前大學時代常黎既地方寶翠園, 發覺呢度既餐廳同商鋪都冇乜點樣變過, 可能租金無乜點加到啦. 記得以前想食餐好的就會黎呢度, 或者樓上既KEYWEST (不過執左了). 學生哥冇乜錢, 所以呢度到對學生仔呢講都唔係平架.

事隔咁多年同男朋友一齊黎食早餐, 感覺好唔同. 查實今日本來想去華星, 點知華星超多人仲要排隊, 所以就黎呢試試下啦. 男友叫左一個叫左個吉烈魚柳煎蛋配多士餐, 而我因為今日不是太肚餓既的關係, 就叫左杯橙汁算啦.

個早餐黎到時有少少失望, 感覺有D HEA, 個包有d扁TAT TAT, 好似放左好耐咁, 佢呢度到隔黎既BAKERY D麵包都幾好食架, 個早餐包咁樣樣, 失望! 另外個主菜魚柳, 魚肉好少, 脆粉好多, 唔好食  , 煎蛋就正正常常啦. 所以整體都好失望, 價錢又唔係特別平喎. 我記得當年幾好食家, 無諗到個水準會差左咁多, 所以下次我都寧願排隊都要去華星啦

2015-10-18 北園

今晚約左男朋友家人同埋我阿姨同媽媽一齊食晚飯, 因為要預祝我阿姨的生日. 呀姨想食中菜, 我地就不如就去北園啦, 又方便大家. 我地叫左一個晚市精選套餐, 唔使諗. 

首先黎啦個廣東片皮鴨, 隻鴨個SIZE都OK大, 不過唔知點解切出黎既皮咁少既? 

可能係PRESENTAION既關係? 又或者刀法既差異? 睇落切出黎皮既唔多. 不過我覺得呢度要讚既係佢D飽皮係每塊都用紙隔住既, 咁就唔會痴住哂啦!

另外D鴨肉就扐去做菜生鴨菘, 我就覺得味道一般, 不是太突出, 感覺無乜鑊氣, 食落D鴨肉有少少騷味.

尾龍躉兩味, 反而令我有驚喜喎! 龍躉真係幾新鮮, 我鐘意清炒西芹多D

乾燒明蝦球都幾好味, 呢道菜用左係大蝦，肉質爽口, 夠哂鑊氣.

紅燒雞絲生翅, 味道中規中矩, 都幾足料.

最後甜品係椰汁糯米糖水, 味道OK. 

仲有鮮果拼盤, 整體上我會比OK啦, 無太大驚喜, 咁既價錢, 每人$200度, 都算係咁啦.

2015-10-17 101肉燥飯專門店

今日自己一個係尖沙咀食午飯, 想快快脆脆食一餐就算啦, 因為仲要趕主下場有野要做. 係厚福街見到呢間肉燥飯專門店人山人海, 咁不如就試下啦! 其實肉燥飯都係小妹的至愛黎架!

打開個menu有唔同款既肉燥飯, 價錢相宜. 

我揀左鹽酥雞翼肉燥飯, 黎到既時候感覺個Size有D細, 而且有少少頽飯既感覺, 都不及當年學生年代既仙跡岩同仙踪林, 食落個未都OK既, 雞翼唔太油, 肉燥飯個SAUCE就有D結.

另外再叫左杯珍珠奶茶, 自從塑化劑發生事之後好耐飲了, 呢度既珍珠奶茶都幾好飲, 不過D珠就略嫌靭左D.

呢度稱自己為肉燥飯專門店, 我覺得幾搞笑, 因為通常真正係出名既餐廳都唔會叫自己做乜乜嘜專門店嘅, 不過都姑且一試. 整體而言呢度我覺得OK. 因為實在坐得好唔舒服, 我短短係到食左碗飯已經要被調左兩次位, 可能我一個人吧! 不過都OK啦, 費事阻住做生意啦