2016-02-16 櫻花中日放題

今晚男友有約, 我就同阿媽橕枱腳啦. 今日試下呢間日式任食放題, 餐廳位於兆萬中心, 個位有D得意, 係賣衫既舖頭後面, 不過入到去原來餐廳都幾大, 坐得唔算迫. 

佢既WINDOW SEAT都幾舒服架

我同媽媽被安排座梳化位, 還算鬆動

點菜紙有A-J 咁多...

先叫左個蟹籽沙津, 用料算新鮮, 味道OK.

野菌什菜, 呢個有驚喜, 佢用左牛油去炒, 粟米同菜都好鮮甜, 唔錯!

由左至右: 火灸蟹棒壽司, 不是一般的蟹柳, 夠JUICY, 有蟹味; 火灸海鰻壽司, 鰻魚有少許乾, 唔夠大塊, 但兩款都唔覺比火灸過....; 北寄貝沙津軍艦, 呢個得, WASABI 跟沙津醬的味道調得岩岩好, 不會是但一邊太槍, 北寄貝亦都夠鮮味

豉汁炒蜆, 好似....無乜肉咁....不過個味炒得幾好, 唔太辣, 我同媽媽都食到

焗蠔/青口, SIZE有D細, 味道OK, 無雪味, 不過黎到唔係好夠熱

芝士白汁澆帆立貝, 呢個賣相得, 幾大隻, 熟度岩岩好, 食落味道都OK!

燒牛舌, 熟度剛剛好, 不過無乜牛味, WELL.... 條牛脷好似咁細條咁既? 唔似正常SIZE..

金菇牛肉卷, 個醬汁唔錯, 牛肉煎得幾香幾腍, 其實本身金菇+牛肉呢個配搭經已無得輸!

紫心香芋丸, 呢個好得! 真係唔係度度有, 我冒住喉嚨痛既危險食左3粒

咬開裡面 (唔好意思, 咬得有D核突), 香芋蓉流哂出黎, 好正!

牛乳海鮮鍋, 個湯味道夠清甜, 不過唔係好覺佢有牛乳, 用料OK, 唔太大驚喜

燒有機菠蘿, 坦白講, 真係唔識分佢有機定無機, 只係識份佢甜OR NOT... 不過呢兩個唔太甜, 仲有D酸

雞軟骨餃子, 保持水準

話明叫中日放題, 呢度都有唔少既中式菜式提供, 士多啤梨骨, 但一粒士多啤梨都搵唔到, 其實即係生炒骨 (WELL, 都係我的FAVORITE), 味道都可以, 呢度既菠蘿就夠哂甜啦!

再ENCORE左個蕃薯丸, 另加芝士年糕, 呢個真係好好味, 外脆內軟, 裡面的芝士簡直熔化了我, 另外的香蕉膏, 味道較甜, 想講我係無叫到架. 不過呢類型既放題, 走單既情況經常發生, 呢度有唔算好嚴重, 而伙記既態度都幾好, 又夠勤快, 比個LIKE!

我同媽媽在黃金時段去, 每位$189 +10%, 呢類型既日式放題都算唔係貴, 但又唔算平咁囉...

2016-02-15 賀喜

今日阿媽又黎搵我食LUNCH, 得悉呢附近開左間日本野, 就去試下啦. 佢個位置係荔枝角公園對面, 去既時間都要搵搵架....

入到去, 地方算寬敞, 我地被排坐落地玻璃旁, 後面就係吧枱, 坐得舒服. 

SET MENU 選擇唔算多, 不過都揀到我想食既野, 而且價錢商宜

媽媽叫左個秘製滑蛋牛肉定食, 隨餐附送芒果蟹籽沙津, 賣相新鮮, 味道都調得好, 芒果夠JUICY鮮甜, 好味!

秘製滑蛋牛肉定食: 賣相唔錯呀, 呢個飯做到一貫水準, 牛肉亦都新鮮, 加埋佢個日式豉油+蛋汁, 味道幾好. 另外隨餐附送一個日式燉蛋, 夠哂滑, 溫度夠, 個飯食都最後先食呢個都仲好熱, 唔錯.

我就叫左個安格斯牛肉鍋定食, 份量足, 而且牛肉都算鮮味, 不過我就覺得偏鹹, 都係媽媽0個個好食D.

 埋單每人$70, 無收加一, REASONABLE啦.

2016-02-14 The Lobby

今日係情人節, 又係男友生日, 我緊係一早有安排啦~ 之前食DINNER覺得半島既THE LOBBY幾好食, 就去呢度啦~ 呢度要晨早訂位, 我早就要兩星期前FULL PAID, 心諗: 係咪咁多人黎呀?

我地被安排坐WINDOW SEAT, 無SEA VIEW, 不過個街景都唔錯架, LOBBY又樓底夠高, 坐得非常舒服!

鵝肝聶士菌批配無花果醬, 呢度菜手工精巧, 中間鵝肝被兩層磨菇(味道似午餐肉, 很香) 夾住, 再配以甜香的無花果醬將味道帶出, 用黎塗上鬆軟的多士上, 好得! 旁邊仲有酸蘿蔔清清口腔, 提升整道菜的醒胃度, 非常細心.

椰菜花松茸忌廉湯, 小妹不太好椰菜花, 幸好忌廉味夠濃, 蓋過了椰菜花的味道, 不過又顯得松茸味不太突出, 整個湯很滑, 有FOAM感, OK! 可惜個餐包要扣分, 唔夠熱...我地要叫佢加熱.

海鮮大燴, 賣相得, 唔好睇佢每樣得一兩舊, 食落都幾飽, 所有海鮮都好鮮, 係個斑有少少鞋, 呢度菜既龍蝦醬好鮮味, 讚!

法式油封鴨腿, 個SIZE有D的骰, 對男友來說不太夠, 鴨腿入口即溶, 香料亦都特別調制, 南瓜蓉好香滑,  好得!

隨餐附送兩杯香檳, 其實我同男友對酒都不太好兼不太有研究, 易入口就OK

我欣賞呢度既PRO SERVICE! 個香檳飲落都幾好味

全晚既高潮, 蜜糖芭菲燴梨, 賣相非常得! 手工又夠精緻! 芭菲夠香滑, 配以旁邊個蝴蠂形的鮮BERRY醬, 感覺好FRESH~! 燴梨以紅酒烹煮過, 令整個甜品生色不少. 仲有我既至愛, 兩個立體心心係BERRY做既脆片, 超好味, 好FRESH, 好脆! PERFECT!

美點雙輝, 保持水準, 不過未算特出

餐飲我叫左ROSE TEA, SETTING好傳統英式FEEL, 個茶又夠足料, 好香濃, 唔怪得D人成日話要黎半島HIGH TEA.

呢個真係UNEXPECTED, 隨餐附送了一支半島玫瑰, 為呢頓晚餐作了一個完美的點綴, 今晚我同男友真係好開心! 男友對小妹今日的行程安排亦都好滿意 (沾沾中.... :p)

明鑽廚房 | 半熟芝士撻 (12個)

半熟芝士撻都算係呢期既潮流小吃, 小妹試過SOGO個間排到水蛇春咁長既BAKE CHEESE TART, 心諗, 要我排咁耐先食到我真係唔制囉! 而且又真係唔係好食到咁. 小妹就最鐘意向呢D受歡迎食物挑戰, 今日適逢情人節兼男友生日前夕, 佢原本話想整我至愛既菠蘿飽比我, 但材料同需時較多, 就改變計劃, 挑戰下半熟芝士撻啦!

嗱! 佢真係有版有眼架. 

杏仁脆餅底
材料                重量
無鹽牛油        80g
糖霜                60g
雞蛋                30g (一隻)
低筋麵粉        80g
高筋麵粉        80g
杏仁粉            30g

芝士餡
材料               重量
忌廉芝士       160g
巴馬臣芝士   32g
牛奶              120g
無鹽牛油        28g
粟粉                8g
蛋黃                30g (一隻)
蛋白                50g (兩隻)
砂糖                36g
檸檬汁            少許

撻皮做法:
1. 無鹽牛油和糖霜拌勻, 直至糖霜溶化
2. 遂少加入雞蛋, 繼續拌勻
3. 輕輕拌入已篩麵粉, 注意不要過份攪拌, 否則餅底會過硬
4. 將麵糰放入雪櫃最少一小時或過夜, 從雪櫃取出後立即搓成3cm直徑的球狀, 再用手指均勻地壓到撻模
5. 在麵糰戮上小孔疏氣, 以180C 焗約6-8分鐘
6. 撻皮焗好後掃上蛋黃

芝士餡做法:
1. 無鹽牛油, 忌廉芝士, 巴馬臣芝士, 牛奶煮至溶化但不要煮滾
2. 1/3 砂糖加入粟粉, 攪拌均勻, 加入芝士糊中, 開火加熱煮成杰糊
3. 趁熱加入蛋黃, 攪拌勻至麵糊光滑無粒粒
4. 蛋白用高速打發至沒有大氣泡後, 把餘下2/3砂糖分數次加入打至企身
5. 先取1/3蛋白與麵糊混合, 再將餘下的蛋白加入麵糊以輕力混合, 再加少許檸檬汁
6. 用匙把麵糊勺到撻皮上, 再放到焗爐焗220C


焗既時候真係好期待!~~~

估唔到第一次就成功了!

今次焗左8分鐘, 其實有少少OVERCOOK左, 所以唔夠"流"

再加上我的玫瑰花士多啤梨, 賣相一流!

整左成12個咁多, 緊係要同至愛分享啦~ 我覺得我直頭可以開舖呀!

今次係我地兩個第一次整餅 (WELL, 雖然佢整整下去左訓覺), 不過真係好開心呀! ^.^

2016-02-12 九龍塘會

今日托舊同事的鴻福, 帶我們一眾到九龍塘會吃開年飯, 這區其實如果無車都幾唔方便, 今日初到訪, 在會所裡遊了一圈, 雖則有點舊但管理都蠻不錯. 

 舊同事說呢度既中菜較西菜出色. 入到中菜廳店內, 裝橫實而不華, 坐得舒服, 格局與出面的酒樓無異, 不過環境較靜, 我諗最噪既應該係我地了...

我與舊同事先到, 很肚餓, 先叫左個蜜燒七味雞軟骨, 炸得好香好脆又有咬勁, 口感唔錯, 不過蜜味不太出, 反而只食到美極味..

叉燒例牌, 好腍蜜味重, 好正, 我地叫左兩碟, 我覺得佢好味過西苑既大哥叉燒!

豬膶杞子浸菠菜, 豬膶略嫌太硬, 不夠爽口, 但算鮮味, 菠菜夠新鮮, 呢道菜OK

金沙疍白炒帶子, 呢個菜用黎撈飯一流! 蛋白炒得滑身, 帶子又夠足料, 西蘭花夠新鮮爽脆, 成個餸被我LAM清, 只嘆金沙唔夠多.

豉汁蒸黃立倉, 兩條都係係我地身後既大魚缸新鮮撈上黎, 用欖角加豉汁清蒸, 魚肉鮮嫩, 勁鮮味呀~!

海皇蒸乳酪, 我見到佢個名咁得意就叫啦, 點知只係什錦海鮮蒸蛋白, 無乜特別, 有D失望.

梅菜扣肉煲, 夠惹味, 梅菜爽甜, 唯一要投訴既係扣肉太少了!

因為有朋友就黎生日, 順道慶祝埋, 呢度既壽飽細細粒, 岩哂我, 個飽又夠鬆軟, 不過佢裡面點解無鹹蛋黃既?

每人埋單先$165, 出面真係無可能.... 係度再次多謝我的舊同事啦~