今晚同男朋友食晚飯, 去咗呢間深宵食堂食串燒, 之前我係尖沙咀嘅分店食過, 呢一間銅鑼灣分店比起尖沙咀分店地方較要細, 不過坐得都好滿.
我哋倆個都好肚餓啊, 一入嚟坐低即刻叫野食. 先叫個蟹肉沙律, 蟹肉好足料, 而且蔬菜新鮮, 再撈埋嗰個酸酸甜甜嘅麻醬好好味喎!
另外再食下蔬菜呢D健康野先開始食燒野啦! 再嚟咗個麻醬豆腐, 豆腐好新鮮, 重豆味, 唔錯喎!
跟住再黎個一口牛, 個賣相好得意, 串牛插係個薯仔上邊, 食落牛肉味重, 而且燒既熟到啱啱好, 唔會太靭, 我以為個薯仔係食埋既, 原來唔係架, 不過好彩無食, 後邊仲有好多好野食
跟住再叫左個煙肉荔枝, 嘩! 原來煙肉加荔枝係可以咁好味嘅! 鮮甜嘅荔枝地再比鹹香嘅煙肉包住, 又甜又咸嘅感覺係味蕾度縱橫交錯, 真係好好味又juicy呀!
男友鍾意食山葵, 我就覺得麻麻地, 因我唔太好痴笠笠既野, 佢就覺得好好味, 簡單嬸左啲鹽上去燒, 男友已經食到JEP JEP聲啦!
我就叫左我嘅至愛芝士年糕, 因為有人又要ON DIET嘅關係, 所以呢我食咗三件, 其實我可以成碟食晒架! 呢個芝士年糕簡直無得頂呀! 外脆內軟! 咬一口我簡直被裡面既芝士溶化了! I LIKE IT!
另外叫咗金菇肥牛卷, 亦都好有水準燒得啱啱好, 裏面嘅菇熟曬而且勁多汁, 牛肉亦都係啱啱熟, 好好味, 而且肉質鮮美!
另外小妹呢個番薯怪又出動喇! 今日見到有番薯梗係唔會放過啦! 好得意喎! 呢隻迷你珍珠番薯細細粒,容易食, 而且亦都好鮮甜!
再叫左個雞軟骨, 亦都燒得剛剛好, 而且咬落去鬆脆可口, 又唔會太靭, 有咬口之餘亦有好甘香嘅雞油味, 好正啊!
再叫左虎蝦, 好大隻, 有手掌咁大, 肉質唔使講, 鮮味可口, 再加上蒜蓉放上去燒, 冇得輸啦!
燒羊架, 呢個係我男友既至愛, 佢話好好食, 我就唔好羊, 佢就話唔太蘇喎, 肉質鮮嫩, 係燒得岩岩好.
燒娃娃菜, 估唔到娃娃菜可以燒到呢一個境界, 既JUICY又香口, 點樣可以做到架呢? 小妹拜服!
最後再叫咗個鵝肝石鍋飯, 份量足, 而且鵝肝亦都燒到外脆內軟, 再加上旁邊嘅金菇雜菜中和返鵝肝既油份, 感覺唔會太油, 我地又成碗LAM哂啦!
呢度真係唔錯喎, 不過都幾貴呀, 咁就食咗成千蚊啦.
沒有留言:
張貼留言