今日媽媽黎搵我食晏, 就去附近嘅厚和街食泰菜, 但間野排到嘔, 於是乎呢就去附近睇吓有冇邊間有位啦, 依, 呢間未試過喎, 就試吓啦.
我哋被安排坐係收銀機隔離, 我坐張凳係一張摺凳, 坐得唔係太舒服, 諗住快食, 是但啦
首先叫咗個煲仔飯, 好似呢間餐廳力推, 就試吓啦, 點知, 伏了! 臘腸超腍, 仲腍過用滾水白烚過嘅香腸咁, 啲雞咬落去係梅DUR DUR嘅, 一啲都唔新鮮, 另外啲飯係削達達嘅, 呢個煲仔飯好唔掂! 我會比零分!
另外我哋仲叫咗其他點心, 首先嚟咗個藥膳鳳爪, 食落都幾好味, 鳳爪炆得好腍 (呢個腍係正常呀) , 而且佢哋藥膳湯都幾足料, 重藥味, 唔錯!
牛肉球, 望落新鮮, 食落亦都鬆化, 呢個有驚喜喎!
跟住再嚟一個蝦餃王, 蝦餃亦都係我好鍾意食中餐用來做CONTROL EXPERIMENT 既點心, 呢個蝦餃SIZE適中, 望落光鮮, 味道保持水準.
跟住叫咗一個蜂巢糕, 好似唔係度度有得食喎, 個樣睇起上黎呢好似年糕, 咬落去有啲蜂蜜又有少少黑糖味, 唔太甜, 不過食落呢有啲立口, 我就覺得呢個一般啫.
整體而言, 除咗嗰個煲仔飯之外, 其他點心都OK, 而呢度嘅店員嘅服務態度都幾好, 我同佢回饋返個煲仔飯個質素, 佢亦都會話跟進一下 , 我覺得可以比多一次機會,
沒有留言:
張貼留言