今日係除夕夜, 男友話要去返我哋第一次約會嘅餐廳, 就係位於西環嘅呢一間比利時餐廳. 本身得一間細舖, 而家可能生意好咗啦, 已經喺隔離再開多一間. 我哋好彩可以去返我哋第一次來個間. 仲記得我哋當日呢系坐吧枱, 當時男朋友仲依然係肥嘟嘟, 佢為咗等我坐得舒服啲, 自己坐係走廊位, 出入都俾人迫住哂, 諗起個場面真係又浪漫又好笑, 今日我哋比安排坐咗係靠牆位置, 坐得舒服.
雖然餐廳嘅size比較細, 但係裏邊嘅裝飾一絲不苟架, 感覺好似去咗外國咁.
我哋叫咗個新年餐, 唔使煩吖嘛. 個餐包一杯比利時啤酒, 店員介紹呢隻PIRAAT金啤, 係比利時岩岩攞奬, 香麥味, 味道不太濃.
另外店員再介紹左另一隻較啱女仔飲既, CAROLUS, 呢隻麥味再重啲, 而且味道帶甜, 我鍾意!
首先頭盤有煙肉帶子沙律, 帶子非常新鮮, 煙肉將帶子嘅鮮味及口感提升至另一個層次, 沙律菜撈埋意大利醋, 感覺清新醒胃
再嚟一個龍蝦湯, 呢個龍蝦湯真係好有HEART, 相信係自家新鮮上湯餚制出嚟嘅, 好有龍蝦既甘香同鮮味, 隔離個餐包唔好睇佢細細條, 亦都花足心思, 烘焗過吹卜卜.
記得我哋第一次來呢度都有食依道菜, 白酒煮青口. 原來男友當時係唔係好好海鮮嘅. 但係佢見我咁鍾意食, 佢自己都食埋一份. 佢話唔知係咪同我一齊耐左, 連口味都變咗, 而家鍾意左食海鮮好多, 今次佢連汁都LAM埋, 嘻嘻! 旁邊個薯角都好出色, 炸得惹味鬆脆, 而且條條肥美, 再加上佢個帶點芥茉既忌廉醬汁, 點薯角真係一流啊! 不過呢我還是鐘愛番茄汁!
到咗MAIN COURSE嘅時間啦, 先來RIB EYE 5成熟先啦! 嘩! 呢塊扒好得, 肥肉均勻, 而且肉質鮮美, 咬落去甘香多汁, 可以媲美日本和牛啊!
另外叫咗龍蝦天使麵, 個龍蝦亦都相當有驚喜, 肉質非常鮮味, 而且熟到啱啱好, 唔會太靭, 龍蝦汁再加埋一齊焗嘅芝士天使麵食真係一流啊!
再讚嘅就係個龍蝦鉗啦, 因為小妹呢非常之懶, 好怕係街度食啲蜆殼類又要MEET又要拆嘅東西 , 咁我就要求店員可唔可以幫我拆咗個蟹拑啦, 點知佢唔單止好樂意, 仲幫我拆得好靚再係上面嬸左D HERBS 添, LIKE!
食到呢度其實都飽左八九成啦, 咁當然啦, 甜品係會有另外一個胃既, 呢個餐亦都包一客甜品, 我哋分別叫咗New York Cheese Cake同埋心太軟. 估唔到呢度連甜品都做得出色.
CHEESE CAKE 口感好Rich而且甜度適中, 真係食多件都仲得呀~!
心太軟, 外脆內流, 做到心太軟呢一道甜品嘅一貫水準, 再加埋佢旁邊個條卷卷非常之有口感.
呢 一餐我會比110分呀! 餐廳仲幫我地影咗張即影即有相, 感覺非常良好啊! 呢度已經成為我地既回憶一部分啦, 我哋兩個一定會再嚟幫襯架, 希望可以保持水準!
沒有留言:
張貼留言