今晚18度, 話凍唔凍, 話熱唔熱啦, 就約阿媽今晚食下雞煲打邊爐烚下烚下先! 呢間前家樂係我朋友介紹嘅, 其實之前聽過個名我覺得有啲快餐店Feel, 所以呢冇乜特別話好想黎食, 不過見到咁多好評就試吓啦, 佢係奧運站行行人天橋既大角咀出口隔離, 都算方便, 火鍋店面積都唔算細, 不過呢都坐得幾迫下架, 我估呢間鋪頭生意都應該唔錯喎.
入到黎唔知食乜好, 有個後生仔就介紹咗我地食雞煲, 好啦, 就食呢個, 我都幾鐘意雞煲, 初初唔知呢個後生仔原來佢係老闆, 以為佢係侍應, 我問同佢係咪叫家樂佢話唔係, 原來前家樂係有意思嘅, 佢係想一路向前而且希望呢間火鍋店比到一家人快樂的感覺, 聽完之後令我對呢間火鍋店既感覺唔同左.
晚上都幾FULL, 要預先訂枱.
另外叫咗啲火鍋配料, 個賣相都唔錯喎, 望落好似幾新鮮
食完雞煲就加清湯落去打邊爐啦, 我發覺呢度啲丸做得好出色, 每一款丸都好好味呀! 包括有白色正方形嘅芝心丸同埋芝士竹輪嘅芝士真係好好味啊! 又香又流! 正呀!
另外牛丸墨魚丸亦都非常之鮮味, 同埋佢個魚蛋亦超級鬆化彈牙, 真係好好食喎! 而黑豚肉亦都嫩滑, 不過呢, 佢嘅手切肥牛我就幾失望啦, 食落有騷味, D蜆亦都唔係咁新鮮, 希望店主可以留意一下, 我覺得呢度係一間有HEART既火鍋店, 老闆員工招呼落力, 我覺得可以比多一次機會.
沒有留言:
張貼留言