永利威@27-09-2015

今日中秋節, 走過上環, 想起大閘蟹既季節又來了, 雖然未算最當造時候, 不過見今日過節咁開心, 不如就同家人一齊食下大閘蟹啦. 

永利威原來都幾耐歷史, 在舖頭見到光緒年間的袓先畫像, 本身係從事酒業的, 而家賣埋蟹, 呢度既蟹分別黎自陽澄湖同太湖.

食大閘蟹時, 通常都會有花雕酒作為良伴, 呢度有唔同年份選擇

老闆都幾貼心, 係咭片背後寫埋煮法, 唔使驚返到屋企唔記得

好緊張, 小妹咁大個女第一次整大閘蟹

似乎隻蟹仲緊張過我.....

我地買左支二十年花雕, 老闆話係最醇, 飲落真係好好味, 味帶甜, 入口香醇, 唔會有好濃烈既感覺, 我好鐘意, 不過飲飲下唔覺唔覺都會幾易醉架

登登! 蒸好了! 其實都幾容易丫! 小妹本身鐘意食公多D, 貪D膏夠CREAMY, 但呢個時候因為未當造, 所以乸D膏都未變硬, 仲係CREAMY, 所以會好食過公, 依家公D膏未夠多

一打開, 嘩, 好正! 金黃色的!

一咬落去, 頓時有被溶化的感覺! 乜野脂肪卡路里都唔理啦! 真係好好味呀! 十月我會再接再厲! 等我呀!

重慶川味@29-09-2015

今日又同同事試下新野, 就試下呢度啦! 呢度可以自由配搭, 我就叫左肥牛, 通菜同芝士腸, 之前幾次去親邊度都咁岩話無沙爹牛, 今日終於食到了!

 餐廳闊落, 坐得尚算舒服, 我地坐左係卡位

黎了! 個賣相唔錯呀, 好大碗! 沙爹香味惹味撲鼻!

黎個CLOSE UP, 牛肉仲好香好鮮味, 爽口嫩滑, 好味呀! D菜都好新鮮, 翠綠爽脆, 個薯粉食落煙靭, 口感似好粗既粉絲, 芝士腸就一般, 不過整體上好味呀! 會再黎幫襯架!

生記@26-09-2015

今日終於同男友去到生記食早餐了, 講就講左好耐啦, 今次我係第一次黎, 佢就成日話呢間野好好食, 我對呢間粥店充滿期望

男友以前係常客, 就等佢拍板啦, 因為佢話一碗粥我倆會食唔哂, 我地於是叫左個常餐 + 粥 +小食. 先黎杯檸茶, 好有驚喜! 竟然有成四塊咁厚既檸檬!

五香肉丁丁麵, 麵既硬度適中, 保持到呢個美食既一貫水準!

麵包 + 奄列, 麵包有D頽, 唔熱既, 個奄列味道OK, 算啦, 呢D擺明唔係生記既強項

煎魚餅, 魚肉好煙靭, 味道鮮美! 又煎得唔油, 得!

呢度既招牌菜, 我地叫左個魚腩及第粥黎啦! 貪佢乜都有, 我雖然唔係太食內臟, 不過呢度既豬膶新鮮爽口, 魚腩又好鮮味, 肉質爽嫩, 個粥唔使講, 軟綿綿, 無落師傅, 真係名不虛傳! 記住食既時候要點下佢D豉油, 會更能帶出配料既鮮味!

店舖地方較小, 坐就坐得唔太舒服架啦, 我地10點入黎都差唔多坐滿, 食到11點度D人都散得七七八八. 呢度我會再黎的!

泰園 @ 2015-09-26

朋友從美國回來, 適逢又有朋友生日, 我地一眾8人去左呢間泰國菜試下, 其實要搵個方便大家, 又要稍為好食, 坐得耐既地方, 都唔係咁易, 之前問過幾間要限時限刻還枱, 到呢間泰園唔使啦, 佢又我地比$500訂, 唉, 真係搵食艱難....

可能網上評價太好, 我好入EXPECTATION, 入到去, 餐廳裝修有點土, 我地被安排左坐最入位置, 都算舒服, 仲有位置放置BB車, 幾好.

先叫左個柚子沙津, 味道清新, 蝦都有鮮味, 保持這道菜的一貫水準

沙嗲串燒, 肉稱不上很JUICY, 味道還可以

四色拼盤, 個人不太好炸野, 只係試左一兩舊, 呢個都係味道OK啦, 感覺都係似PARTY小食D炸丸咁

炒椰菜苖, 有咬口, 個人還是喜歡通菜

 炒貴刁, 呢個炒得幾有鑊氣, 味道OK

炒通菜始終都係我既至愛, 夠爽!

泰園南瓜海上鮮, 有蝦, 不過炸得好犀利, 其他海鮮有魚, 魷魚等, 食落都幾惹味

另外叫左個冬蔭功湯 (唔記得影相) , 都幾好飲, 唔太辣, 岩哂我!

呢個西瓜綿綿冰都係我全晚最為欣賞的, 個味道幾FRESH, 尤其岩岩食完咁多濃味野, 我地叫左益力多味, 但就唔太食到, 另外如果個西瓜再大D就好, 呢個只係個西瓜仔, 都唔夠我地每人一啖, 就已經要成$88, 有D貴

椰汁糕, 好彩叫左6舊, 如果唔係又嘥哂.... 無諗到呢度呢個咁普通既甜品會整到咁唔好食, TEXTURE好結&硬, 唔香椰汁味, 呢個PRESENTATION好似好COLORFUL咁, 其實隻羹好似個豉油碟咁大, 唔可以就咁放落口, 所以我地要用另一隻羹不黎食, 係咪多餘呢?

呢個係一入到餐廳既海鮮吧, 都算有D噱頭, 不過佢想做個格調做唔到, 我覺得有D似茶記.

餐廳服務嘛嘛, 人手又少, 我地好多時候叫人都好辛苦先叫到.

個晚食完返去勁口渴, 係好耐無試過咁口渴, 我仲飲左成罐可樂先解到D味精, 呢間野都幾唔掂呀, 價錢又唔係平, 唔係好JUSTIFY咁多LIKE喎.

VIVO@2015-09-25

今晚約左我既好朋友HAPPY FRIDAY, 我倆都好鐘意SOHO, 今日我朋友揀左呢間, 佢六點到, 見到無乜人, 又好似坐得幾舒服, 咁就不如試下新野啦. 入到去好有酒店FEEL.

餐前麵包, 有薄脆 + 香草麵包, 熱辣辣, 點醋食, 好味!

WAITER 介紹我地叫CESAR SALAD, 賣相唔錯, D菜幾新鮮, 芝士咸度適中, 個沙津醬又夠味, OK喎!

MENU唔太多選擇, 我地都想食海鮮既關係, 叫左個SEAFOOD PASTA, 味道OK, 不過感覺好似落左美極, 所以唔太突出, D海鮮就幾新鮮, 可惜少左D

 鴨肉PIZZA, 嘩, 呢個PIZZA第一啖咬, 都幾得意, 好多鴨肉, 但再食, 超~~~~~多油! 我地食剩左一半.... 其實佢個味都有D怪, 有D腥味, 鴨都係烤好食D

到差不多我地食完8點幾9點度, 先有一枱客入黎, 成晚比我地倆個包場, 感覺都幾好, 不過都唔明點解星期五D生意會咁淡薄, 野食質素又未至於差啫.

稻坊@2015-09-24

同同事再四處出走覓食, 走到曼坊, 見到呢間稻坊, 深知係稻香旗下集團, 所以有點猶疑, 坦白講, 自從稻香上市以來, 本人都未曾幫襯過, 因為佢既質素實在太差, 感覺上係為左減低成本所造成的結果, 小妹其實真係好懷念以前既稻香... 當年真係好好食

上OPENRICE得知呢度係新裝修再重開, 姑且試下吧, 反正附近都無咩食.

我地無BOOK位, 侍應安排左我同同事坐係窗邊位置, 都幾好FEEL, 坐得好舒服

我地叫左個玫瑰花飽, 個賣相幾得架, 不過無餡的......

食都咁上下先發覺原來係有餡, 不過係隻蚊! 唉..... 即刻又無哂胃口, 經理立刻幫我地取消左呢個點心

再黎個豬手, 其實我本身就唔太好, 不過同事話想食就一齊試下啦, 第一啖咬落去都幾煙靭, 再食, 咦, 點解個汁個味咁似鳳爪既? 仲有, 佢D汁好快鯨到一舊舊, 好核突呀

油菜, 好老, 感覺唔太新鮮.....

蝦乾排骨煲仔飯, 呢個個味道都OK, 不過有少少欏味....

三星燒賣, 個味最正常, 但稱唔上好食

午市時間都坐無虛席架, 一來附近無乜選擇, 二來我地見到黎幫襯既好多都係D呀生, 食野要求都無乜所謂個D.... ANYWAY, 呢度又真係幾抵食, 每人埋單$50, 但係我會寧願用呢個錢去幫襯返留下既又一間囉. 稻香又再一次令我失望, 唉!

又有驚喜的: 又一間餐室 @2015-09-22

今日同同事去美孚食晏, 不如就下去曼坊睇下有咩食, 我地見到有一間外表非常地道的日式餐廳, 一入到去, 咦? 點解咁神奇既? 前半個舖係日式裝修, 後半個舖就係一間西餐廳裝修, 入到去既時候亞姐叫我地坐去西餐廳個邊, 因為個邊冷氣太凍啦, 所以我地就坐返去日式餐廳個邊, 亞姐個面口好似唔係咁好睇咁. 

睇下有乜食先, 個menu好似有d雜亂咁, 有all day breakfast, 又有午市套餐放埋一齊, 另外個價錢又分兩個, 真係要細心閱讀. 

我地就分別叫左雜錦魚生飯同鰻魚飯, 之前係附近食左一個極難食的鰻魚飯, 希望今次有驚喜啦!

點不知過去真係有驚喜喎! 兩個飯既賣相都ok, 個鰻魚係熱辣辣, 又JUICY, 肉質鬆化, 好好食! 我清哂! 我想講其實個飯size都唔細架




同事叫左魚生飯, 個賣相都好得喎! 而佢每一個配料都好新鮮, 真係食落有驚喜呀! 呢個價錢, 有咁既質素, 可以再黎呀! 不過如果D阿姐既服務再好D就好了.