2015-10-16 韓盛朗

今日同同事相約食晏, 今日就試下新野, 呢間係一位住係美孚既朋友推介的, 咁就要去食下啦! 入到黎, 傳統韓國餐廳FEEL, 坐得舒服. 

前菜比較簡單, 外表有D乾憎憎既感覺, 食落味道OK

叫左我食韓菜既必叫之算, 牛肋骨鍋, 好好味, 牛肋骨夠腍, 做到呢度菜既水準!

同事叫左石鍋牛肉飯, 牛肉夠惹味, 用料亦都新鮮, 得! 又多一間可以再幫襯的食肆啦!

2015-10-20 川婆婆

今日黎到尖沙咀食川菜, 呢間餐廳門面光鮮, 但店內裝修有D奇怪, 一入到去覺得有點西式, 又有GRAFFITI

然後我地被安排入去裡面的座位的裝修又突然間變得好似屋企FEEL咁, Anyway, 我地主要唔係食裝修, 食物質素先係最重要. 

我地叫左一個青花椒桂花魚, 因為我地都唔食得辣既關係, 所以叫小辣, 但係都唔好睇少呀, 食落都幾辣, 不過我好鐘意D麻香味, 桂花魚好滑, 味道幾濃, 呢度菜個份量超大, 由於太大鍋, 食都咁上下覺得有D油, 我地兩個食唔曬, 剩左半鍋.  

另外我地再叫左一個香辣蝦, 一見到d道菜既時候, 我地兩個目定口呆, 賣相雖然吸引, 但死啦,  咁多辣椒, 一定好辣啦.... 不過食落去又唔係真係好辣, 而且仲有好濃郁既川椒的香味, 非常之惹味! D蝦炸得金黃鬆脆, 殼都可以食埋架, 而肉質都幾鮮味. 

另外我地再加左個安格斯牛柳粒, 呢個好得, 牛肉粒好新鮮, 好好味, 食落仲有油甘味, 好香, 對於我呢個牛魔皇黎講, 全晚我最鍾意就係呢道菜啦. 

臨走的時候見到問口出面燈箱有個叫做麻辣九宮格火鍋, 嘩, 好似好有噱頭咁, 睇下遲D有無機會試下. 我其實比起以前食得辣左, 希望可以繼續努力, 食到多D唔同既美食啦. 

2015-10-14 汀汀烤活魚

今晚約左媽媽係荃灣食飯, 都好耐冇黎呢頭啦, 嘩! 乜原來呢條街已經變食街. 今日我地選擇呢間汀汀烤活魚, 好似都有好幾間分店, 咁不如就是試下啦.

入到店內地方都唔大, 裝修有點殘舊, 不過就夠哂地道啦, 咁先有大排擋風味. 

 

小妹係海鮮精, 呢度岩哂我. 我地先叫左一個花甲雞煲, 一上菜, 嘩, 都好大煲喎, 花甲又大隻多汁, 都幾惹味, 雞肉應該唔係新鮮雞, 不過肉質都算鬆化, 食落無雪味. 

再黎一個胡椒海鮮蟹煲, 都好大個, 而且好足料, 呢度菜用左膏蟹, 仲有好多花甲, 賣相吸引.

一打開個殼, 嘩! 好多膏呀! 可以媲美大閘蟹喎! 味道都唔錯, 胡椒湯能將海鮮鮮味帶出.

不過呢到都唔平咖, 買單都要差唔多六百蚊, 如果大排擋既價錢黎講都算幾貴, 但係佢呢度既海鮮又係算幾新鮮啦, 相對雞煲就無海鮮做得出色 . 

三希樓御饍閣@2015-10-17

同男友及家人飲茶，唔想去太遠，就去試下三希樓啦，之前都聽朋友介紹過，口碑好似唔錯。佢地有川菜同粵菜，並分開2層，今次試下粵菜先。

店內環境開揚，三面望到中環半山景，不過餐廳面積不是很大，但尚算寬敞，坐得舒服。

點心款式不算很多，但仍可揀到心水。

先點招牌雪影叉燒飽, 外皮香脆, 餡料新鮮, 熱辣辣, 好味呀!

叫左個男友家人喜愛既燒味, 燒腩仔個皮燒得好脆, 燒鵝都惹味可口!

生磨紅米腸粉, 小妹真係第一次食, 而男友媽咪就話係呢個係好耐以前都有架了, 佢呢個點心雖然無餡, 但好香米味, 食落爽口仲有少少彈牙, 加埋個甜醬同麻醬, 我同男友既至愛呀!

秘製酒香豬膶燒賣, 呢個豬膶都幾爽口, 但始終唔及我當年食維記豬膶面既豬膶既鮮味咁一試難忘, 請留意, 我當時係唔食豬膶的, 係維記改變左我, 不過, ANYWAY, 呢個點心都OK, 下面既燒賣肉都好味, 不錯.

又係做CONTROL EXPERIMENT既時候啦, 飲茶必嗌: 水晶蝦餃, 佢每粒個SIZE都比平時食開D細架, 但個皮好彈牙, 餡料新鮮, 好味喎!

珍珠雞, 不負眾望, 餡料多, 我最愛都係個黃!

呢個又係我飲茶必嗌既流沙奶蛋飽啦! 嘩! 好得!!!!

流得黎又夠沙! 正呀~~~~~不過真係小心睇熱呀!

男友因為今日放監, 可以唔使ON DIET, 所以佢追加左個叉燒酥, 呢個保持水準啦, 個皮都幾鬆化.

佢都未夠, 再加左個四川擔擔面, 佢話好好味又帶點麻,  好食過平時個D, 但太辣了, 我食唔到...

糖水時間, 蛋白杏仁茶, 生磨的, 夠多蛋白, 好味!

酒釀丸子, 又係我既至愛糖水之一, 甜度適中, 酒釀加清香既桂花, 好好味呀!

整體上水準不錯, 每度點心都表現平均, 可以再黎!

梨泰園@2015-10-11

今日同男友及家人去尖沙咀買完衫, 就一齊係尖沙咀睇下有咩好野食啦. 賣衫個度既老闆娘介紹我地呢間就近既韓國餐廳, 入到去好寬敞, 都差唔多坐滿, 我地侍應安排到去一間VIP房, 嘩! 成間房都係我地既, 裡面裝橫好有傳統韓國味道, 仲坐得好舒服喎! 不過就有少少煙味, 有D美中不足啦!

無啦啦包廂, 都幾好, 不過就好難叫人, 另外呢度有D侍應係韓國人, 唔係太識聽廣東話

前菜有八款, 我好鐘意個蕃薯, 問佢地有問得追加或另外叫, 侍應竟然話無, 我地係度諗, 無理由想比錢加都唔得, 可能佢地唔明我地講乜, 不過算啦, 好在無, 如果唔係食唔哂D主菜. 

我地叫左一個芝士泡菜薄餅, 都幾香口, 又特別, 不過食落有D油, 最後食唔哂.

再叫左半客炸雞, 其實媽媽一向都唔鍾意我食炸野, 但係依到好似好出名咁喎, 無理由唔試下架! 真係好好味呀! 佢唔似係雪藏雞, 食落都好有鮮味, 肉質鬆化, 我地揀左梅子醬, 酸酸甜甜咁, 唔怪之得韓國炸雞而家咁HIT啦!

另外叫左一個我每逄食韓國菜一定會叫要既牛肋骨鍋,  呢個菜都係好鐘意用來做control experiment架, 果然不負眾望, 牛肋骨又香又腍又入味, 蘿蔔唔使講啦, 又入味又好食!

海鮮雜菜鍋, 清清地海鮮都算新鮮, 不過就唔及之前幾度菜咁有驚喜LU!

男另外再加左一個海鮮粉絲煲, 小妹好鐘意食韓國粉絲, 貪佢索哂D汁好好味, 而且呢道菜份量足, 個味都又較得好好呀, 食材都算新鮮, 好味! 呢度可以再返頭呀!

Home Bar@2015-10-14

今日約左阿媽去荃灣食LUNCH, 諗唔到食乜就四周圍貢下有冇新野試下啦! 原來荃灣地鐵站附近有一間細細嘅西餐廳, 亦都係BAR黎既, 裡面裝修好有格調, 感覺好CLASSY. 呢度仲有band show同埋ladies night喎.

我地今日叫左兩個SET LUNCH,  媽咪就要餐湯, 我就要沙律. 個羅宋湯OK啦, 唔太突出, 餐包正正常常, 微暖

個沙律就反而有驚喜喎! D菜好新鮮, 個SAUCE夠醒胃, 仲有吞拿魚教個味都幾好, 呢個前菜幾唔錯喎!

個MAIN呢阿媽就揀左三文魚煎大蝦, 不過三文魚肉質就一般, 食落有D硬, 有少少OVERCOOK左, 比較之下隻蝦煮得出色D, 肉質幾爽

我就叫左個紐西蘭西冷牛扒, 叫左五成熟, 熟度岩岩好, 牛扒肉質嫩滑,仲有牛味添! 不過我feel到塊扒有用野那過, 但就那得唔太勁, 所以味道都OK.

我地另外叫左特飲, 分別有洛神花茶, 酸酸咪咪, 幾好飲喎! 又夠大杯

另外再叫左杯熱檸賓, 不過佢落得太多利賓納, 我覺得太甜了! 用黎沖多一杯都仲得.

再加左個TIRAMISU, 我平時唔太好TIRAMISU的, 呢度算係整得幾好食, 唔太重酒味, 食落都幾新鮮咁.

每人埋單100蚊度, 價錢算 REASONABLE 啦, 不過我EXPECT呢個位置可以再平D. 我地12點入到黎的時候無乜人, 走既時侯1點度, 都已經坐滿人了, 呢間餐廳係呢個位置黎講, 算係幾好生意喎!