2015-10-31 E Molto Buono

今日男朋友終於做完功課, 搞到8點幾9點先至可以食晚飯, 所以我梗係要帶佢去食好野餵勞下佢啦!

我地去左銅鑼灣一間法國餐廳, 呢棟大厦係拍拖早期都有黎過, 不過係另外一間CAFE, 入到餐廳裏面, 咦? 比我想像之中細喎, 空間感不大, 起初侍應安排左我去近窗口位置既一張二人枱, 

不過由於我有的扐住一袋二袋既的關係坐得唔太舒服, 所以侍應安排左我去左一張四人枱, 坐得舒服D. 

我同男朋友都唔太飲酒的關係, 所以我地都叫左一杯菠蘿汁. 我地ORDER左兩個SET DINNER

呢度個麵包好有驚喜, 應該係師傅自己做的, 加左香草去焗, 熱辣辣好鬆軟. 

頭盤我地分別兩個都叫哂, 一個係煙肉水牛芝士佯番茄凍, 呢個頭盤味道清新, 感覺開胃, 芝士唔會太濃, 我鍾意呀! 

另外頭盤係吞拿魚牛油果他他, 由於我就唔太食生野, 男朋友就比較喜愛呢個, 吞拿魚肉質新鮮, 牛油果有夠香, 加埋一齊都好有CHEMISTRY!. 

跟住就係我至愛既龍蝦湯啦, 龍蝦湯味道濃郁, 好有龍蝦鮮味, 有誠意之作! 

男友叫左個蘑菇湯, 碟上仲配左個麵包, 上面有粒粒蘑菇, 嘩, 飲落啖啖蘑菇肉, 好得! 如果要我評分, 我會覺得呢個蘑菇湯會做得比較出色D!

法國鵝肝伴焦糖蘋果, 不負眾望, 鵝肝外脆內軟, 揚溢著油甘香味, 所有卡路里脂肪完全唔理! 

另外白酒煮藍青口, 加入左火腿去煮, 味道比較咸, 同侍應反影左佢就話因為呢度既廚會跟傳統的法國嘅主法, 所以味道會濃一D, 我同男友都偏愛比較清淡D既白酒煮加白汁煮, 不過青口都係好新鮮的. 

食完幾度菜, 中間會有一個紅桑子雪芭比我地清一清口腔, 再食下一度的主菜. 紅桑子雪芭味道真係好清新, 感覺好FRESH呀, 我既戰鬥力又提升了!

襯個MAIN未黎, 我地出左去露台睇下, 咁樣望出既銅鑼灣感覺都幾唔同, 有D似煩囂中的一個綠洲.

主菜分別叫左澳洲神戶牛排同埋同埋香煎虎蝦伴辣肉腸. 虎蝦新鮮又大隻, 加埋自製既番茄醬好得! 不過都係略咸左少少.

由於我太飽的關係, 澳洲神戶牛排我淨係食到幾舊, 好彩有男朋友係到! :D 呢個牛好得! 肉質鮮味, 充滿油甘香, 掂! 仲有佢下面有個紫色蕃薯蓉托底, 我真係好appreciate呀! 正迎合小妹呢個蕃薯怪既口味, 不過側邊既醬汁就一般

最後一個甜品係法式香橙焦糖燉蛋白, 查實我當時已經99%, 不過呢個燉蛋真係好好味, 甜度適中, 賣相又靚, 所以我都差唔多食曬呀! 呢度可以再黎呀!

2015-10-21 Panash 大失所望!

呢度係我以前大學時代常黎既地方寶翠園, 發覺呢度既餐廳同商鋪都冇乜點樣變過, 可能租金無乜點加到啦. 記得以前想食餐好的就會黎呢度, 或者樓上既KEYWEST (不過執左了). 學生哥冇乜錢, 所以呢度到對學生仔呢講都唔係平架.

事隔咁多年同男朋友一齊黎食早餐, 感覺好唔同. 查實今日本來想去華星, 點知華星超多人仲要排隊, 所以就黎呢試試下啦. 男友叫左一個叫左個吉烈魚柳煎蛋配多士餐, 而我因為今日不是太肚餓既的關係, 就叫左杯橙汁算啦.

個早餐黎到時有少少失望, 感覺有D HEA, 個包有d扁TAT TAT, 好似放左好耐咁, 佢呢度到隔黎既BAKERY D麵包都幾好食架, 個早餐包咁樣樣, 失望! 另外個主菜魚柳, 魚肉好少, 脆粉好多, 唔好食  , 煎蛋就正正常常啦. 所以整體都好失望, 價錢又唔係特別平喎. 我記得當年幾好食家, 無諗到個水準會差左咁多, 所以下次我都寧願排隊都要去華星啦

2015-10-18 北園

今晚約左男朋友家人同埋我阿姨同媽媽一齊食晚飯, 因為要預祝我阿姨的生日. 呀姨想食中菜, 我地就不如就去北園啦, 又方便大家. 我地叫左一個晚市精選套餐, 唔使諗. 

首先黎啦個廣東片皮鴨, 隻鴨個SIZE都OK大, 不過唔知點解切出黎既皮咁少既? 

可能係PRESENTAION既關係? 又或者刀法既差異? 睇落切出黎皮既唔多. 不過我覺得呢度要讚既係佢D飽皮係每塊都用紙隔住既, 咁就唔會痴住哂啦!

另外D鴨肉就扐去做菜生鴨菘, 我就覺得味道一般, 不是太突出, 感覺無乜鑊氣, 食落D鴨肉有少少騷味.

尾龍躉兩味, 反而令我有驚喜喎! 龍躉真係幾新鮮, 我鐘意清炒西芹多D

乾燒明蝦球都幾好味, 呢道菜用左係大蝦，肉質爽口, 夠哂鑊氣.

紅燒雞絲生翅, 味道中規中矩, 都幾足料.

最後甜品係椰汁糯米糖水, 味道OK. 

仲有鮮果拼盤, 整體上我會比OK啦, 無太大驚喜, 咁既價錢, 每人$200度, 都算係咁啦.

2015-10-17 101肉燥飯專門店

今日自己一個係尖沙咀食午飯, 想快快脆脆食一餐就算啦, 因為仲要趕主下場有野要做. 係厚福街見到呢間肉燥飯專門店人山人海, 咁不如就試下啦! 其實肉燥飯都係小妹的至愛黎架!

打開個menu有唔同款既肉燥飯, 價錢相宜. 

我揀左鹽酥雞翼肉燥飯, 黎到既時候感覺個Size有D細, 而且有少少頽飯既感覺, 都不及當年學生年代既仙跡岩同仙踪林, 食落個未都OK既, 雞翼唔太油, 肉燥飯個SAUCE就有D結.

另外再叫左杯珍珠奶茶, 自從塑化劑發生事之後好耐飲了, 呢度既珍珠奶茶都幾好飲, 不過D珠就略嫌靭左D.

呢度稱自己為肉燥飯專門店, 我覺得幾搞笑, 因為通常真正係出名既餐廳都唔會叫自己做乜乜嘜專門店嘅, 不過都姑且一試. 整體而言呢度我覺得OK. 因為實在坐得好唔舒服, 我短短係到食左碗飯已經要被調左兩次位, 可能我一個人吧! 不過都OK啦, 費事阻住做生意啦

2015-10-16 韓盛朗

今日同同事相約食晏, 今日就試下新野, 呢間係一位住係美孚既朋友推介的, 咁就要去食下啦! 入到黎, 傳統韓國餐廳FEEL, 坐得舒服. 

前菜比較簡單, 外表有D乾憎憎既感覺, 食落味道OK

叫左我食韓菜既必叫之算, 牛肋骨鍋, 好好味, 牛肋骨夠腍, 做到呢度菜既水準!

同事叫左石鍋牛肉飯, 牛肉夠惹味, 用料亦都新鮮, 得! 又多一間可以再幫襯的食肆啦!

2015-10-20 川婆婆

今日黎到尖沙咀食川菜, 呢間餐廳門面光鮮, 但店內裝修有D奇怪, 一入到去覺得有點西式, 又有GRAFFITI

然後我地被安排入去裡面的座位的裝修又突然間變得好似屋企FEEL咁, Anyway, 我地主要唔係食裝修, 食物質素先係最重要. 

我地叫左一個青花椒桂花魚, 因為我地都唔食得辣既關係, 所以叫小辣, 但係都唔好睇少呀, 食落都幾辣, 不過我好鐘意D麻香味, 桂花魚好滑, 味道幾濃, 呢度菜個份量超大, 由於太大鍋, 食都咁上下覺得有D油, 我地兩個食唔曬, 剩左半鍋.  

另外我地再叫左一個香辣蝦, 一見到d道菜既時候, 我地兩個目定口呆, 賣相雖然吸引, 但死啦,  咁多辣椒, 一定好辣啦.... 不過食落去又唔係真係好辣, 而且仲有好濃郁既川椒的香味, 非常之惹味! D蝦炸得金黃鬆脆, 殼都可以食埋架, 而肉質都幾鮮味. 

另外我地再加左個安格斯牛柳粒, 呢個好得, 牛肉粒好新鮮, 好好味, 食落仲有油甘味, 好香, 對於我呢個牛魔皇黎講, 全晚我最鍾意就係呢道菜啦. 

臨走的時候見到問口出面燈箱有個叫做麻辣九宮格火鍋, 嘩, 好似好有噱頭咁, 睇下遲D有無機會試下. 我其實比起以前食得辣左, 希望可以繼續努力, 食到多D唔同既美食啦. 

2015-10-14 汀汀烤活魚

今晚約左媽媽係荃灣食飯, 都好耐冇黎呢頭啦, 嘩! 乜原來呢條街已經變食街. 今日我地選擇呢間汀汀烤活魚, 好似都有好幾間分店, 咁不如就是試下啦.

入到店內地方都唔大, 裝修有點殘舊, 不過就夠哂地道啦, 咁先有大排擋風味. 

 

小妹係海鮮精, 呢度岩哂我. 我地先叫左一個花甲雞煲, 一上菜, 嘩, 都好大煲喎, 花甲又大隻多汁, 都幾惹味, 雞肉應該唔係新鮮雞, 不過肉質都算鬆化, 食落無雪味. 

再黎一個胡椒海鮮蟹煲, 都好大個, 而且好足料, 呢度菜用左膏蟹, 仲有好多花甲, 賣相吸引.

一打開個殼, 嘩! 好多膏呀! 可以媲美大閘蟹喎! 味道都唔錯, 胡椒湯能將海鮮鮮味帶出.

不過呢到都唔平咖, 買單都要差唔多六百蚊, 如果大排擋既價錢黎講都算幾貴, 但係佢呢度既海鮮又係算幾新鮮啦, 相對雞煲就無海鮮做得出色 .