海安咖啡@2015-10-10

今日同男友去嘆早餐, 每次車經過呢度既時候都好想去試, 外面睇佢個LOOK好似七八十年代既咖啡室, 依家香港地真係買少見少架! 

一入到黎, 裡面都係好懷舊, 仲人山人海添, 坐就坐得唔太舒服架啦, 不過呢度都係預你食完就走.

男友知我鐘意食菠蘿油, 佢試過話呢度既好正, 強烈推介. 食落真係WOW! 個皮好脆, 個包新鮮又暖笠笠, 牛油你放幾多悉隨尊便, 我地當然放哂全舊啦! 好甘香, 好好味呀!

熱奶茶, 男友叫左個茶走, 即係用煉奶去沖, 好香滑!

鍋仔公司麵 , 齋係個賣相都好得, 呢度係用褔字麵, 簡真係童年回憶, 一來人大左好少食呢D即食麵, 二來食都係食公仔麵既多, 還記得以前係會整碎包褔字麵再加味粉當SNACK食! 佢D配料都好好味, 當中個鴨胸最正! 鮮味爽口仲夠大件, 好得!

呢個係男友熱烈推介, 香葱醉牛炒蛋厚多士, 呢度仲有提供即磨黑椒比你, 好體貼, 個蛋炒得好香好滑, 再加埋個香葱, 加埋個黑椒吊一吊味, 好得, 不過個醉牛個味相對個味就被搶了

我地仲未夠喉, 叫左個西多士, 我要比佢兩個WOW! 西多士一向都係我既至愛, 呢個西多士唔單止係厚咁簡單, 佢中間仲分幾層分別搽上牛油, 食落好有質感, 又夠甘香! 炸得岩岩好, 又唔油, 好正! WOW WOW!

又發現西環一間好食的茶餐廳, 呢度一定會返轉頭再幫襯啦!

景村雲南米線 @2015-10-09

呢頭都有唔少呢類既湯麵選擇, 今日又試呢間平時一過十二點三就好多人排既餐廳.

餐廳細細, 亦有雅緻裝修, 坐得舒服.

同事叫左雞肉+腐竹小鍋米線,  雞肉夠大塊, 食落一D都唔鞋口, 爽口鮮味! OK!

我就叫左肥牛墨魚頭小鍋米線, 肥牛鮮味, 墨魚頭就新鮮爽口兼彈牙, 好得! 唯一要投訴係份量太多, 食唔哂添! 可以再黎, 希望KEEP住個水平!

French Window@2015-10-09

今日同男朋友撐枱腳, 星期五當然要HAPPY FRIDAY啦! 因為之前我要去個COCKTAIL PARTY, 所以黎左IFC, 唔想去太遠食DINNER, 咁不如去FRENCH WINDOW啦! 之前我同過舊同事黎呢度飲野, 環境都唔錯架! 今次試下食DINNER先! 

MENU唔多選譯, 不過都可以楝到我地想食既野

未黎野食前先黎個餐飽, 個飽有D失望, 唔熱, 仲好靭, 不過個牛油有D驚喜, 加左D松子, 又靚, 有口感!

見到有唔少食評介紹龍蝦的, 招牌菜就梗係叫黎試下啦! WOW! 個PRESENTATION好得, 好似一件藝術品咁, 好精緻!

再ZOOM IN, 每一舊龍蝦肉上面都放左一條沙津菜係上面, 好得意! 食落肉質鮮甜, 爽口彈牙, 好好味呀!

叫左個藍青口, 有鴨肉煮的, 我覺得味道幾特別, 藍青口隻隻鮮味, 不過鴨肉係呢度菜既作用不大, 因為D藍青口本身已經好夠味, 反而D鴨肉食落好似湯渣咁, 鴨始終都係烤既好食

配埋個薯條, 條條肥美, 點茄汁一流!

另外叫左一個Beef Tenderloin, 不負眾望, 好腍好JUICY! 咁大舊同厚身都可以煮到咁好真係佩服! 上面個SAUCE好香牛油味, 好得呀, 不過佢個燒汁就嘛嘛.

另外因為男友未飽既關係, 我地在叫多左個SUCKLING PIG, 下面有個芝士薯仔托底, 幾香, 我當時都9成飽啦, 所以只係試左一啖, 個豬夠脆, 呢度菜保持水準啦, 其實我一向對呢道菜一般, 此終都係中國燒乳豬出色D! 

最後我地甜品叫左開心果雪糕, 食落唔太滑, 有冰感, 幾香開心果味, 味道OK. 

呢道仲有個十幾尺高既酒櫃, 幾有氣派!

豆花妹@2015-10-08

今日下午開旺角, 好耐都冇試過掃街了, 應該以年計啦! 見到呢間豆花妹岩岩開舖, 用豆腐花製作招來好似幾得意喎, 不過呢度無位坐, 要企係度食, 唔緊要啦, 好彩係商場裡面. 

我叫左個豆腐花米線, 個醬有D似台灣肉燥味, 再加上蔥花, 豆腐花同米線一齊, 我都係第一次食! 又幾好食喎, 幾個味都好夾, 個豆花又夠香滑. 

叫左杯柑桔話梅蜜, 真材實料喎, 真係有粒話梅, 生津解渴, 又唔太甜, 好飲!

另外叫左小食, 分別有醉雞, 炸雞, 呢兩個味道OK. 

再叫左甘薯條, 嘩, 呢個真係好得! 無得頂! 小妹係蕃薯怪, 真係唔係度度有得食呢個, 佢上面仲嬸左D調味粉, 好惹味呀!! 值得推介!

翠華@2015-10-08

今晚男朋友又夜左收工, 所以陪佢去翠華食一個late dinner. 翠華一向都幾有質素, 不過價錢唔平, 仲有坐得唔太舒服, 仲有D污糟既感覺. 

今晚男友又要食減肥餐, 雞扒走汁飯, 雞扒都幾大塊, 煎得夠香夠JUICY

另外個餐湯羅宋湯就中規中矩啦

我自己就叫左個公司通粉, 好耐都冇食過JUNK FOOD, 所以覺得好好食, 午餐肉個味唔太咸, 又夠厚身, 火腿有成三塊咁多, 可能耐無食, 覺得特別好味. 不過如果比得呢個價錢, 我會PREFER華星LU, 翠華都係唔夠我近期既至愛華星咁好味.

小越南@2015-10-07

今日論到黎呢間小越南試下啦, 見到門口有好多推介, 應該都唔錯呱. 入到黎, 簡單裝修, 光線充足, 坐得舒服.

我同同事分別叫左個香茅豬扒檬粉, 同香茅牛肉飯, 果然不負眾望! 香茅豬扒鬆軟可口, 加埋d檬粉湯一齊食, 清爽醒胃! 

另外香茅牛肉飯都好好食, 牛肉鮮味, 調味得宜! 我地兩個都各自清哂!

呢度好似好出名牛油雞翼, 都唔平喎, 成$59仲要貴過我個地MAIN, 點知, 真係好好食! 我好耐都無食過咁好味既牛油雞翼啦! 通常食親都無牛油味, 呢個好重好香牛油味, 個脆漿薄薄地, 又有口感, 呢個得! 值得推介!

另外再加左個通菜, 個湯好好味, 應該係佢用黎煮麵既清湯! 唔重味精, 好好味呀! 會再黎!

南小館@2015-10-07

今日走去同阿媽走訪旺角食飯, 唔知食乜好, 就去朗豪坊求其搵一間. 去到FOOD COURT, 我地走左入南小館試下.

首先叫左我每次食上海菜必叫既雞絲粉皮, 呢度菜個味有d怪, 食落酸酸地咁, 起初我仲以為係變壞左, 但呢度既侍應話唔係, 係呢到既煮法係要加醋, 我真係第一次食, 不過D雞絲都有d唔新鮮囉, 肉質有D梅.....

另外叫左小籠包, 保持水準, 湯夠多, 餡料又夠熱, 而且豬肉味都幾鮮

另外我見到佢有一個季節限定食品, 叫做黑松露蘑菇包, 個樣真係好得意, 真係好似一隻冬菇咁樣, 但其實佢成個飽連埋個年冬菇椗都係用飽做出來的, 餡料全都係蘑菇, 仲有好香既黑松露味, 熱辣辣, 好鬆軟, 呢個真係好得值得推介!