今晚同男朋友撐枱腳, 嚟到中環依間蠔巴試下先, 入到黎好浪漫咁喎, 仲有一啲聖誕新年裝飾, 好有PARTY FEEL, 嚟到嘅時候可能7點太早, 未有人黎, 感覺好似包左場咁.
餐廳唔算大, 但都感覺寬敞, 坐得舒服.
店員稱呢度既水係唔收錢的, 每支新鮮開瓶.
呢間餐廳裝修很有心思, 法國酒同書籍, 廚房擺設, 一絲不苟,
仲有BAR枱喎
一坐低嘅時候侍應擺低左一碟有兩個白色圓餅, 然後再到啲熱水落去, 佢話係餐巾嚟嘅, 瞬間呢個圓餅即刻長高成為兩條濕紙巾, 我覺得好神奇呀! 雖然唔係咩新野.... ^_^!
我叫左杯Cranberry Juice, 味道OK. 最衰我地倆個都唔好酒, 呢度有不同酒既選擇
叫咗半打法國生蠔, 由上至下右至左咁排列分別係POUSSE, 店員話係最CREAMY, 我就覺得佢海水味最淡, 都好鮮甜, 建議我地第一隻食先, 跟住右邊係LA BOITE BIJOUX (紅宝石),
我覺得係最鮮甜的, 亦都好CREAMY, 另外最後左邊隻PAPIN, 海水味最濃, 所以放喺最後食係最啱嘅. 整體上來講三蠔都好好味! 唔需加檸檬汁已經PERFECT! 我最LIKE 紅宝石!
跟住有Cesar Salad, 沙律上面個PARMA HAM 真係好好味呀, 夠哂鹹香, 菜新鮮唔使講啦.
跟住呢個芝士焗露筍, 裏邊仲有PARMA HAM 一齊焗, 呢個亦都好好味, 熱辣辣, 蘆筍熟度啱啱好, 喺裏面嘅火腿鹹香味滲透整個芝士忌廉汁, 男友仲企圖將成碗汁LAM 清!
食到咁上下都不斷多人黎了, 大部分都係拖友 , 個場都KEEP到靜靜地既浪漫氣氛
我就叫咗個鴨腿, 嘩! 呢個真係好得! 廚師用左slow cook 方法去煮, 成個鴨腿入口即溶, 嗰鴨嘅油甘香味令我不禁偷食咗幾塊鴨皮, 我一向都食得健康, 所有家禽嘅皮都唔食架, 今次又比佢破咗我戒了!
最後甜品時間到啦, 分別係蜜桃餅, 味道唔太甜, 新鮮熱辣, 好味!
蘋果雪芭, 好有清新蘋果味道! 賣相又得!
呢度既食物水平高, 服務好, 值得再嚟啊!
