2016-03-08 Fusion Gourmet - 意外發現: 有誠意的上環西餐廳, 必食拿破侖!

今日我與男友到上環四出覓食, 無意間找到這幢商業大廈, 原來也開了不少樓上餐廳, 我們看過幾間覺得這裏的環境及價錢比較合理, 所以就選了這裡.

這裡地方都頗開揚, 放到七八張枱左右, 而且旁邊還有很多廚具供客人購買, 甚為特別. 

店員介紹了一個法國青口, 他說是這裡必食, 就聽他的, 這道菜有別於一般的藍青口, WOW! 我們未見過這些那麽大隻的青口, 一啖咬落的時候, 完全感受到青口超級鮮嫩多汁, 好得!

黑毛豬, 不負眾望, 肉質鮮嫩爽口, 多汁味美, 外皮煎得香脆, 只係略嫌太少了!

炆牛肉, 用了出名傳熱快的生鐡鍋來煮, 肉汁濃厚, 用來DIP這裡的自家製的麵包簡直是絶配!

這裡的自家製麵包夠鬆軟, 溫度夠, 而且牛油呢採用了奶味重的牛油, 好特別! 我鐘意!

這裡的重點推介還是甜品, 拿破崙, 一刀切下, 你會聽到見到非常鬆化, CUSTARD及生果用料新鮮, 真的可以ENCORE!

2016-03-06 紫粵軒

今晚有大學同學從遠方返來, 因為要近佢屋企所以我哋一行11人來到將軍澳搵食, 由於人數太多既關係, 佢又想食中菜, 所以呢我就揀咗紫粵軒. 入到黎, 環境優雅又夠靜. 

我哋先叫咗脆皮燒腩仔, 一見到話得12件, 我哋都係啱啱夠一人一件, 不過都真係幾脆, 肉味咸香, 好食!

鮑魚汁豬仔腳, size都係好的骰, 不過味道都調校得幾好, 應該落左花椒八角等香料, 肉質亦都新鮮爽口彈牙.

跟住再叫左片皮鴨, 個片皮鴨係一鴨兩食, 呢度菜味道未算突出.

香草蜜汁叉燒, 好腍, 蜜汁既香甜加上叉燒的惹味, 係最完美既配搭!

跟住再叫左個花雕蔥爆蝦球煲, 蝦肉爽口彈牙, 味道保持水準, 夠香夠惹味.

杞子浸時蔬, 呢度菜保持水準, 湯底清甜, 菠菜新鮮, 與鮮紅的杞子係視覺上已經贏哂!

紫粵軒炒飯, 炒飯炒得乾身, 配以蝦肉, 魚肉來炒, 真係幾唔錯!

柚子蜂蜜吊燒雞, 個柚子蜂蜜其實係另上, 雞燒得香脆, 再配柚子醬, 真係估唔到原來可以咁樣點雞食, 感覺清新, 真係幾好味喎! 不過都嫌份量太細啦

另一個一鴨兩食, 炒鴨鬆, 呢個呢就味道普通啦, 我覺得呢道菜好難做得好突出

因為實在太唔夠飽啦, 最後我哋在加左荷香古法蒸滑雞, 呢個賣相得, 而且雞整得好鮮味嫩滑, 再放咗啲紅棗落去蒸即刻覺得呢道菜好養生咁, 紅棗嘅香味再加埋薑蔥惹味配搭, 好得!

我地11個人, 每人埋單$336, 酒店中菜黎講, 正常價啦.... 

2016-03-05 Hellow Kitty 中菜軒

今日專誠同男友過海去試呢間HELLO KITTY中菜軒, 其實小妹小時候真係好鐘意KITTY架, 所以雖然都預左黎呢度係重視KITTY多過食物質素, 但男友為左滿足我, 都好樂意陪我黎呀~ 呢度個位唔係大方便, 舊樓區, 所以同KITTY呢個THEME唔係好夾

入到去, 裝修別緻, 岩哂我呢D大唔透既小朋友, 睇得出店主係店內每一個裝橫都好花心思, 每個角落都充滿住KITTY, 店內掛有不同做型既KITTY中國水墨畫

刻了KITTY頭的枱凳

座位好的骰, 坐得唔太舒服

香港人都係貪新鮮, 午市好爆

仲有好多KITTY不同擺設, 好卡嘩依呢!

連燈都唔少得KITTY

包括所有餐具.... 硬件配套做得很好, 不過軟件就麻麻地, 好似唔夠人手咁

餐牌, 好得意呀!!! 不過價錢都唔平咁喎!

我先叫左個杏汁白肺湯, 第一啖飲落去, 嘩, 乜咁咸既....仲有幾重味精既感覺, 不過都有落杏仁既

HELLO KITTY蝦餃, 好打打打打打打打意意意意意意意呀! 裡面既蝦都唔錯喎, 唔係得個樣架

流沙奶皇飽, 當我見到佢地三個時, 真係萌爆了! 唔捨得食呀!

咬落都幾香蛋黃味, 可惜唔太流....

連張點心底紙都係KITTY, 問你死未!

奶湯鮮菇浸時菜, 用了芥蘭, 都幾新鮮, 味道唔錯

台灣紫蘇骨, 呢個好得, 排骨夠腍, 個醬汁酸美美, 味道調較得洽到好處!

芒果布甸, 個布甸有點普通, 放得太多魚膠粉, 返而最有驚喜係上面粒朱古力, 好香濃既DARK CHOCOLATE

鮮果牛奶燉蛋白, 燉蛋白食落有D鞋, 裡面有氣泡唔夠滑, 個大KITTY頭查實係蕉糖整既糖, 好硬的, 問店長, 整到咁大粒點食呀, 佢話裝飾居多.... 不過我覺得有點浪費囉

埋單每人$640, 每人$320, WELL, 抵唔抵食就見仁見智啦, 但我認, 我係KITTY FANS, 擺明有BIAS架啦~

2016-02-15 賀喜

今天同同事食午飯, 食到無野好食, 搵到呢間新開的日本野, 就試試啦! 入到黎空間感大, 有SUSHI BAR枱, 坐得舒服

午餐MENU都係比較STANDARD, 價錢都還可以, 我叫左安格斯牛肉鍋定食, 同事叫左滑蛋牛肉定食

前菜, 芒果沙津, 嘩!!! 有成四份一個芒果咁濟... 仲好甜添! 下面D青瓜同蟹柳都好好味架

安格斯牛肉鍋定食, 份量足, 用料尚算新鮮, 但個湯咸左D

滑蛋牛肉定食, 燉蛋好香好滑, 滑蛋牛D牛我反而會覺得呢個SET既好味D

呢度唔收加一, 價錢未算話扺, 不過都可以再黎.

2016-02-17 KS Cafe

今晚又同男朋友撐枱腳, 黎到天后呢間新開嘅CAFE試吓. 係OPENRICE睇其他食評相以為呢度都好大, 上到黎餐廳唔算寬敞, 今晚都幾多客, 全場爆滿, 感覺有D迫, 我哋被安排坐窗口位置, 都坐得舒服. 

我哋點左是日晚餐再加一度A LA CARTE

首先來個餐湯先, 賣相唔錯, 咦? 點解又係西蘭花忌廉湯嘅? 因為小妹其實不太好西蘭花, 但好似呢排出親去食飯既是日餐湯都係呢款, 不過味道OK啦, 幾滑, 蒜蓉飽要讚, 好香好脆, 蒜蓉勁多再加上滿滿的牛油, 無得輸!

另外就係是頭盤, 有唔同嘅PHARMA HAM 同SALAMI 腸, 仲有沙律蜜瓜作配菜, 感覺清新, PHARMA HAM 油份不算太高, 估計月份不是太長, 沒太多像果味, 而小妹則比較欣賞佢既SALAMI 腸, 唔太咸, 夠甘香!

另外我哋A LA CARTE 嗌咗個三式Mini Burger, 買相得! 分別有和牛, 魚柳及鵝肝, 每個餡料都做得出色, 非常JUICY, 係全晚小妹最欣賞的一度菜

我個MAIN叫咗香辣青口意大利麵, 感覺份量適中, 不過青口可以多番少少就好啦! 呢度菜香蒜味重, 唔太辣, 味道中規中矩

男友的MAIN COURSE 就叫咗烤美國牛柳配乾蔥紅酒汁, 食落有少許靭, 而且牛味不算太重, 呢個有少許失望.

餐飲分別叫咗凍檸茶同埋一杯橙汁特飲

橙汁特飲有少少結既感覺.....

最後來一個甜品就係藍苺奶凍, 呢個反而有D驚喜喎. 奶凍夠香滑.

最後埋單兩個人$631, 其實都幾貴喎, 性價比不算太高