2016-04-16 景逸軒

今晚又與男友及雙方家人共進晚饍, 黎到呢棟新商廈, 有很多食肆已經進駐, 今晚家人選了景逸軒. 店內地方寬敞, 光線充足, 坐得舒適

招牌海苔九肚魚, 咬落外脆內軟, 魚肉新鮮, 可惜分量太少, 都不足以八個大人一人一件

濃湯桃膠浸菜芯, 上湯清甜, 桃膠乃係桃樹的天然分泌物, 蘊含豐富植物膠原, 沒有特別味道, 食完感覺就食緊雪蛤膏, 感覺滋潤

鮮果拔絲黑豚肉, 咕嚕肉係小妹的至愛, 基本上每之出街叫餸食飯都會有呢味, 呢度菜黑豚肉啖啖肉, 肉質爽嫩多汁, 加上旁邊生果鮮豔悅目的點綴, 無得輸!

琥珀雀巢海中寶, 用左斑片、海蝦 等海鮮, 用料新鮮, 不過略嫌份量偏少

蝦米醬乾煸四季豆, 蝦醬肉碎炒得夠香夠惹味, 四季豆又夠JUICY, 係我平時必食的上海菜之一

秘製欖角一口骨, 小妹很喜歡欖角個種獨特的味道, 而且豬肉啖啖肉, 炒得又夠乾身, 好好味!

泰式原個菠蘿炒飯, 真係未試過係中式酒樓食泰國野, 不過都炒得好有水準, 飯夠乾身, 海鮮夠哂足料, 加埋肉鬆, 夠香口!

原個椰皇燉鮮奶, 萬眾其待的甜品, 因為要等成8個字先有, 但食得出佢係新鮮製造, 清甜椰皇水加上鮮奶, 蒸得夠香夠滑, 先只係$28個, 我真係唔會去許留山囉.

2016-04-07 The Grill Room

今日晏晝嚟到呢間西餐廳食個lunch, 餐廳店內面積不算大, 但係座位安排得宜, 坐得舒服, 我同同行友人被安排坐窗口位置.

Set Menu lunch都係一啲大路嘢, 我就叫咗個8OZ西冷扒配薯角蔬菜, 另外同行友人就叫左香煎青衣魚柳燴忌廉紅椒醬汁, 我哋分別叫咗一個沙律同埋一個餐湯. 

依度嘅沙律菜呢都可以, 算新鮮, 但塊巴馬HAM就超咸..... 麻麻地喎..

唔知點解呢排食親西餐既餐湯都係忌廉椰菜花湯, 有點悶喎! 而小妹又不是太好椰菜花.... 餐包仲烘到咁鬼死燶...唉..

我個牛扒話咗五成熟, 但係食落有啲鞋口, 不是太有牛味, 重好咸添.... ;( 其實出嚟西餐度食扒真係唔係度度都食到靚嘅扒架, 下次都盡量避免叫了, 因為呢度叫GRILL ROOM所以就想試下, 查實我對GRILL呢一個煮法呢有D保留, 始終都覺得傳統嘅鐵板燒係最好食嘅! 呢個MAIN就麻麻地啦.

而友人叫的青衣魚柳味道就勝一籌啦! 食落魚肉新鮮, 有咬勁, 煎得又剛剛好, 幾好!

餐飲就叫咗LATTE同埋菊花茶, 味道正路, 沒有什麼驚喜.

2016-01-10 沙爹王

今日同男友黎我倆既至愛, 沙爹王橕枱腳. 銅鑼灣呢間分店都幾好坐, 地方大, 裝修無乜點變, 但感覺都仲幾新. 

叫左杯藍蝶花梨茶, 味道有D似洛神花, 不過略嫌太甜

我既至愛, 白咖喱豬~~~ 真係咁多年都咁好味!!! 係我最鐘意食既咖喱!!! 香茅豬夠鮮又多肉, 煎得好香! 加上呢個秘制白咖喱汁, 少少辣, 咖喱再加上忌廉既香滑~~ 好正呀~~~~~~

男友就試新野, 大阪咖喱飯, 有D似傳統日式咖喱, 再加埋滑蛋, 都好好味呀! 不過點到取代唔到我對白咖喱豬既鐘愛~~~

2016-03-17 UCC

今日早左收工, 約左人又未夠鐘, 突然肚餓, 不如就近近地係UCC食個TEA, 估唔到平日下午茶時段都FULL HOUSE, 乜D人好似唔使做咁既? 

呢度就最出名窩夫架啦, 呢個碎蛋三文魚窩夫可以一次滿足我三個願望, 塗上碎蛋三文魚即成咸食窩夫, 仲可以另外叫佢上糖漿即成傳統甜食窩夫, 第三就係有沙津啦, 夠哂健康丫嘛~~

餐飲就緊係無可能唔叫既UCC蒸餾咖啡啦, 一個字, 香! 原來一個人的下午茶係可以咁滿足~偶爾咁樣都幾寫意

2016-03-15 Espresso Alchemy

今日同朋友黎到WK廣場呢間咖啡店試吓, 呢個廣場係喺地牢嘅, 雖然左落位置係彌敦道, 好似好旺咁, 但係其實呢個商場冇乜人行, 呢間咖啡店都係幾入既位置, 呢入到去感覺靜靜地, 坐得舒服, 啱晒同朋友傾吓計, 嘆杯咖啡

今日朋友就黎試吓呢度啲咖啡, 首先嚟咗杯普通嘅即磨咖啡, 味道香濃, 而且我最欣賞佢個拉花好鬼PRO.

另外因為我唔驚夜晚訓唔著既關係, 所以飲水算啦, 呢度啲水呢好搞笑, 係要自己出去斟架, 而其他食物佢地就會送過黎

叫咗個煙三文魚配蛋沙律麥多士, 看似簡單, 但我覺得佢哋做得好有誠意, 煙三文魚同埋碎蛋沙律都用料新鮮, 而且賣相吸引, 味道唔使講, 有水準! 

加左個薯條, 呢度亦都做得好出色, 條條肥美, 熟度岩岩好, 加上特製海鹽, 真係食到停唔到架!

再叫左個香煎虎蝦配蘆筍番茄汁意粉, 呢個唔好睇落好似細細碟, 但係足夠兩個人份量, 虎蝦都好大隻, 而且新鮮爽口, 真係好味過好多西餐廳架~!

在最後加左個Banana Bread with Honey and Butter, 個樣好得意, 而且係自家製的, 鬆軟的麵包洋溢著淡淡的香蕉味, 再加上蜜糖同埋牛油, 亦都係冇得輸嘅配搭! 如果蜜糖同埋牛油再多啲就好啦, 因為呢個包都吸得幾快

 價錢又幾化算,我覺得呢度可以再嚟

2016-03-14 首爾家

今晚同阿媽食韓國燒烤, 嚟到銅鑼灣呢間店, 位置比較不起眼, 諗唔到有間幾骨子嘅韓國燒烤餐廳. 呢度既侍應有D係韓國人, 唔識聽廣東話, 英文都有D抆, 不過感覺幾地道.

店的面積唔算大, 但坐得舒服

前菜感覺上不太特別, 呢度嘅泡菜呢顏色比較淺, 而味道亦都唔太突出. 

LA牛肋骨, 望落個樣好似好新鮮,燒起黎幾香, 咬落肉質都幾鮮味, 個爐中間係一個燉蛋黎, 我起初以為係個醬汁, 咁大個女都係第一次咁樣食法, 味道都唔錯... 我覺得係全晚最好食既

牛舌睇落都好新鮮, 但燒起左食落冇乜味, 幾一般

店員很好, 會走過黎幫你燒, 不過我覺得佢燒得太耐, 太靭

媽媽想食人蔘雞, 叫左個黎試下, 幾失望, 首先個湯冇乜味, 好水, 而個人蔘雞裏邊啲餡亦都冇乜誠意, 成道菜都好淡咁, 麻麻哋

唯一係啲菜比較新鮮

2016-02-27 泰尚

今晚又同屋企人同男友食晚飯, 又想食泰國嘢, 咁就去泰尚啦! 上次去過真係幾好食, 今次再encore. 佢因為好生意, 係隔離開多左個舖, 地方算係大左, 但坐得未算舒服. 

我哋首先叫咗金不換炒大蜆, 蜆肉隻隻鮮味, 又大又多汁, 好好食呀!

第二道菜叫咗泰式元蹄, 小妹其實對元蹄麻麻, 不過男友想試下就叫啦, 佢呢道菜個味道有D似中式, 唔油膩, 而且能帶出豬肉嘅鮮味, 加上側邊足料嘅西蘭花, 等我地唔使再叫多道蔬菜, OK!

再叫左一個南瓜海鮮炒飯, 炒飯炒得乾身, 味道夠惹味, 海鮮雖然唔係乜嘢新鮮嘅海鮮, 應該都係雪藏嘅, 不過呢品質良好, 魷魚及魚肉等海鮮爽口彈牙, 加埋肉鬆, 無得輸呀!

呢個明爐烏頭魚都係我倆既至愛, 好享受一路拾下拾下既感覺, 條魚肉質新鮮爽口, 加上佢地特製既酸甜汁, 好好味, 兩個人LAM到一D肉都無剩!

再叫左一個黃咖喱雞, 黃咖喱係我嘅至愛, 因為佢係咁多種咖喱之中最唔辣的, 呢個個賣相好似平平無奇, 但個味都較得幾好架, 不過呢我略嫌佢有啲水, 雞肉就普通啦, 整體上OK, 不過再加埋佢個烤餅食簡直一流! 呢度既烤餅好乾身味道又夠香, 一啲都唔油!

最後甜品就梗係要食芒果糯米飯啦! 其實小妹最鍾意食黑糯米, 我問店員可唔可以只要黑糯米啊, 佢話唔得最得 :( 只可以黑白..... 咪咁無法啦, 呢度菜做得有水準, 芒果夠甜又足料, 有成個咁芒果咁多! 而且個椰漿亦都非常鮮味, 椰味濃, VERY GOOD!

呢度水準真穩定, 繼續努力!